Ал белгилегендей, айрым жарандар каттоонун максатын толук түшүнбөй калышы мүмкүн, бул болсо үй жаныбарларынын, канаттуулардын саны же өздөрүнүн чарбаларынын абалы тууралуу маалымат берүүдөн баш тартууга алып келиши ыктымал. Бул маалыматты берүү социалдык төлөмдөрдөн баш тартууга же салык киргизүүгө алып келет деген жаңылыш түшүнүк менен байланыштуу.
«Каттоо социалдык төлөмдөргө кандайдыр бир коркунуч туудурат же салык милдеттенмелерин жаратуучу нерсе деп коркпош керек», - деп министр ишендирди.
Акунбеков ошондой эле каттоонун өлкөдөгү жаныбарлардын санынын так эсептелиши үчүн өтө маанилүү экенин баса белгиледи. Алар жаныбарларды убагында эмдөө, ветеринардык иш-чараларды пландаштыруу жана вакциналардын жетиштүү көлөмүн камсыздоо үчүн керек.
Ошондуктан Эрлист Акунбеков жарандарды өздөрүнүн чарбаларынын абалы, жаныбарлардын саны жана жер аянты тууралуу толук жана так маалымат берүүгө чакырды.
Кыргызстанда айыл чарба каттоосу 20-марттан 10-апрелге чейин өтөт. Анын ишке ашырылышына жергиликтүү өз алдынча башкаруу органдары жана статистика боюнча аймактык бөлүмдөр катышат.
Каттоо учурунда үй чарбаларынын эгин аянттары, жайыттар, чарба имараттары, короолор, ошондой эле жаныбарлар жана үй канаттууларынын саны эсептелет.
