Кыргыз Республикасынын Саламаттыкты сактоо министрлигинин көрсөтмөсүнө ылайык, Улуттук ооруканада Катар мамлекетинен келген адистердин катышуусунда кохлеардык имплантация операциялары ийгиликтүү өткөрүлдү.
Ведомствонун маалыматы боюнча, бардык процедуралар толугу менен акысыз жүргүзүлдү. Ар кандай аймактардан келген жети чоң бейтаптын угуу жөндөмү калыбына келтирилди.
Катар тарап операциялар үчүн бардык зарыл материалдарды камсыз кылды. Улуттук оорукананын дарыгерлери катарлык адистер менен биргеликте иштеп, өздөрүнүн көндүмдөрүн жакшыртып, кохлеардык имплантация боюнча тажрыйба алмашышты.
Кошумча маалымат:
Кохлеардык имплантация — угуу жөндөмү начар адамдарга угуу жөндөмүн калыбына келтирүүгө жардам берген жогорку технологиялуу хирургиялык ыкма. ```
