Иш-чарада Германиянын Кыргызстандагы элчиси Моника Ленхард жана Ош облусундагы президенттин ыйгарым укуктуу өкүлү Эльчибек Джантаев катышты.
Облус ооруканасынын башкы дарыгери Атабек Жумалиев жаңы имарат оор абалдагы боюнда бар аялдарга жана эрте төрөлгөн наристелерге медициналык жардам көрсөтүү үчүн арналганын белгиледи. «Бул долбоор немис өнөктөштөр менен кызматташтыкта иштелип чыккан. Курулуштун жалпы баасы 9,5 миллион евро болот. Оорукананын аймагында жайгашкан 249 орундуу эки кабаттуу имарат курулат, жалпы аянты 4 723 квадрат метр. Борбор хирургдар, терапевттер, педиатрлар жана кардиологдор сыяктуу ар кандай адистердин көзөмөлүндө кызмат көрсөтөт», — деп кошумчалады Жумалиев.
Анын айтымында, курулуш эки жылды алат, бирок подрядчик долбоорду 1,5 жылда аяктаарын убада кылууда.
Долбоорду «China Road and Bridge Corporation in Kyrgyzstan» компаниясы (Кыргызстандагы «China Road And Bridge Corporation» өкүлчүлүгү) ишке ашырат.
Курулуш иштери Ош шаарында, Жогорку Увам көчөсүндө, 12Б үйүндө башталат.
Долбоордун аяктоо мөөнөтү — 2028-жылдын 3-марты.
