Бишкекте 1-декабрда беш ИВЛ SV300 (Mindray, Neo функциясы менен) аппараттарын тапшыруу салтанаты өттү. Бул жабдыктар «Кыргызстандын саламаттык сактоо системасын бекемдөө» долбоорунун алкагында БУУнун Өнүктүрүү программасы (ПРООН) тарабынан колдоого алынган.
Саламаттык сактоо министрлигинин маалыматына ылайык, жабдыктардын жалпы баасы $65 миңден ашты. Аппараттар Баткенде жана Баткен облусундагы неонатология бөлүмдөрүнө арналган, алар жаңы төрөлгөндөргө, анын ичинде оор абалдагы жана дем алуу жетишсиздигинен жабыркагандарга тез жардам көрсөтүү үчүн зарыл.
Саламаттык сактоо министри Эркин Чечейбаев ПРООНго узак мөөнөттүү колдоосу үчүн ыраазычылык билдирип, жаңы жабдыктар неонаталдык жардам жана бала өлүмүн азайтуу боюнча улуттук приоритеттерге жооп берерин белгиледи. «Бул ИВЛ аппараттары Баткен облусундагы кичинекей бейтаптар үчүн чоң мааниге ээ. Биз өлкөнүн эң алыскы бурчтарында да квалификациялуу жардам көрсөтүүгө аракет кылып жатабыз. ПРООНдун саламаттык сактоо тармагындагы техникалык базаны өнүктүрүүгө, адистерди даярдоого жана заманбап технологияларды киргизүүгө кошкон салымы абдан баалуу», - деди министр.
Кыргызстандагы ПРООНдун туруктуу өкүлү Александра Соловьева, берилген ИВЛ аппараттары Баткен облусундагы неонаталдык бөлүмдөрдүн даярдыгын жогорулатууга жана жаңы төрөлгөндөргө убагында жана сапаттуу медициналык жардам алууга мүмкүнчүлүк берет деп кошумчалады. «Саламаттык сактоо министрлиги менен көп жылдык кызматташтыгыбыз системалык мамиле жана эл аралык өнөктөштүк өмүрдү сактап калууга жөндөмдүү экенин тастыктап турат. Биз медициналык кызматтарды модернизациялоодо, кадрларды даярдоодо жана инновациялык чечимдерди киргизүүдө өлкөгө колдоону улантууну пландап жатабыз», - деди ал.
«Жабдыктарды жеткирүүдөн тышкары, ПРООН Баткен облусунда жаңы ИВЛ аппараттары менен иштөө үчүн медициналык кызматкерлерди окутууну камсыздайт, бул алардын биринчи күндөн баштап эффективдүү жана коопсуз колдонулушуна мүмкүндүк берет», - деп айтылды билдирүүдө. ```
