Соттор администрацияны резервдик фонддорду колдонууга милдеттендирип, өкмөттөн өз чечимдерин аткаруу боюнча отчетту дүйшөмбүгө чейин сунуштоону талап кылышты.
Мурда Дональд Трамп социалдык тармактарында федералдык өкмөттүн шатдаун шартында төлөмдөрдү улантууга укугу жок экенин билдирген, "эгер сот тиешелүү юридикалык көрсөтмөлөрдү берсе, финансылоону камсыз кылуу мен үчүн сыймык болот" деп кошумчалаган.
SNAP программасы кирешеси федералдык кедейлик деңгээлинен 130% ашпаган америкалыктарга жардам берүү үчүн арналган, бул бир адам үчүн айына болжол менен 1,632 доллар жана эки адамдан турган үй-бүлө үчүн 2,215 долларды түзөт. Учурда программа менен 42 миллионго жакын жаран камтылган.
Айыл чарба министрлиги (USDA) мурда программа үчүн толук финансылоонун жетишсиздиги тууралуу маалымдаган, анын чыгымдары айына 8,5-9 миллиард долларды түзөт. Администрация Конгресстин бюджетисиз агенттиктин финансылоону улантууга укугу жок экенин билдирген.
Ошентсе да, Провиденс шаарындагы округдук судья Джон Макконнелл резервдик фонддон 5,25 миллиард долларды пайдаланбоо чечими туура эместигин айтып, агенттикти бул каражаттарды "мүмкүн болушунча эрте" бөлүштүрүүгө милдеттендирди. Каражат жетишпеген учурда сот 23 миллиард долларлык башка фондду пайдалануу мүмкүнчүлүгүн карап чыгууга уруксат берди.
Бостондогу судья Индира Талвани 25 штат жана Колумбия округу тарабынан берилген доо арыз боюнча да окшош чечим чыгарды, администрация резервдик каражаттарды пайдаланууга юридикалык тыюу салуу тууралуу жаңылыш маалымат бергенин белгиледи.
Эскерте кетсек, шатдаун, башкача айтканда, федералдык өкмөттүн ишин токтотуу, 1-октябрдан башталган. Бул 2019-жылдан бери мамлекеттик мекемелердин иши бюджеттин бекитилбегени себептүү жарым-жартылай токтотулган биринчи учур.
