Россияда бийлик жумушчу мигранттар үчүн милдеттүү медициналык текшерүүдөн өтпөгөндүгү үчүн жоопкерчилик чараларын киргизүүнү пландаштырууда. Бул тууралуу Мамлекеттик Думанын төрагасы Вячеслав Володиндин расмий каналында билдирилди.
Жаңы эрежелерге ылайык, өлкөгө үч айдан ашык мөөнөткө келген чет өлкөлүк жарандар үчүн медициналык текшерүүдөн өтүү мөөнөтү 90 күндөн 30 күнгө кыскартылат. Докторлор текшерүүнүн жыйынтыктарын Ички иштер министрлигине билдирүүгө милдеттүү, ал эми инфекциялык оорулар аныкталган учурда — Роспотребнадзорго. Бул чаралар мыйзам бузгандарды тез арада депортациялоого багытталган.
Медициналык текшерүүдөн баш тартуу үчүн административдик жоопкерчилик каралат, анын ичинде айыппулдар жана соттун чечими менен өлкөдөн чыгаруу мүмкүнчүлүгү.
Ошондой эле мигранттардын медициналык документтерин жасалмалоо кылмыш катары бааланат.
«Бул чаралар мигранттарга көзөмөлдү күчөтүүгө жана коомдук коопсуздукту жогорулатууга багытталган», — деп белгиледи Вячеслав Володин.
