Генералдык прокуратуранын пресс-кызматынын маалыматы боюнча, Базар-Коргон районунда жеке турак жай куруу үчүн жер тилкелеринин мыйзамсыз бөлүнүшү фактылары аныкталды. Жалал-Абад облусунун прокуратурасы тарабынан жүргүзүлгөн текшерүүнүн натыйжасында, Базар-Коргон райондук администрациясынын, Акман айыл өкмөтүнүн жана жергиликтүү айылдык кеңештин кызматкерлери, ошондой эле архитектура жана мамлекеттик каттоо органдарынын өкүлдөрү ирригация үчүн бөлүнгөн жана зарыл трансформациядан өтпөгөн жерлерди жалпы пландын курамына мыйзамсыз киргизгендиги белгилүү болду.
2019-жылдан 2022-жылга чейин 117 адамга жеке турак үйлөрдү куруу үчүн 7,18 гектар жер мыйзамсыз бөлүнүп, анын баасы 67,9 миллион сомду түзгөн.
Генералдык прокуратуранын пресс-кызматынын маалыматы боюнча, бул фактылар боюнча "Кызматтык ыйгарым укуктарды кыянаттык менен пайдалануу" беренеси боюнча кылмыш иши козголду жана учурда тергөө иш-чаралары жүргүзүлүүдө.
