Маалым болгондой, 1-январда болгон уурулук боюнча тергөө иштери жүргүзүлүүдө. Маалыматка ылайык, саат 20:00 чамасында «Ак-Бата» жаңы конушунда белгисиз адамдар жаран О.Ш.га таандык 10 миң сомдук Redmi 15C маркасындагы мобилдик телефонду ачык уурдап, окуя болгон жерден качып кетишкен. Бул боюнча Кыргыз Республикасынын Кылмыш-жаза кодексинин 206-беренеси боюнча кылмыш иши козголгон.
Бишкек шаардык ички иштер башкармалыгынын (ШИИБ) кылмыш иликтөө башкармалыгынын кызматкерлери жүргүзгөн ыкчам иш-чаралардын натыйжасында 2007, 2008 жана 2010-жылдары туулган шектүүлөр аныкталып, кармалды.
Алдын ала маалыматтар боюнча, кармалгандардын бири Бишкек шаарында жасалган бир нече мүлктүк кылмыштарга тиешеси болушу мүмкүн. Уурдалган мобилдик телефондор кийинки сатуу үчүн өткөрүлүп берилген. Алардын бир бөлүгү, анын ичинде Samsung A7, Redmi 11 жана iPhone 7, тергөө учурунда өз ыктыяры менен кайтарылып берилди.
Учурда мыйзамсыз аракеттердин бардык эпизоддорун жана мүмкүн болгон башка жабырлануучуларды аныктоо максатында кошумча тергөө жана ыкчам иш-чаралар улантылууда.
