Ведомствонун маалыматына ылайык, Бишкек–Ош трассасы боюнча бараткан айдоочу ООБДД кызматкерлерине кайрылып, жубайынын төрөтү башталганын билдирген. Инспекторлор төрөгөн аялды патрулдук унаага отургузуп, тез арада төрөт үйүнө жеткиришти.
Аял Сузак районундагы А.Ташиев атындагы төрөт үйүндө бала төрөдү. Ал Базар-Коргондун тургуну. Эне менен баланын абалы жакшы деп бааланууда.
Инспекторлор жакынкы күндөрдө үй-бүлөнү кыдырып чыгаарын билдиришти.
Президент Садыр Жапаров 13-майда Жалал-Абад облусуна болгон жумушчу сапарында Сузак районундагы жаңы төрөт бөлүмүнүн жана балдар ооруканасынын ачылышына катышты.
Үч кабаттуу имаратта заманбап төрөт бөлүмү жана балдар ооруканасы жайгашкан, 150 орунга ылайыкташтырылган. Объектти куруу үчүн жергиликтүү бийлик 3 гектар жер бөлгөн. Медициналык мекемени курууга 570 млн сом каралган.
Камчыбек Ташиев каржылоонун суммасы 11 млн долларды түзгөнүн билдирди.
Мамлекет башчысы Камчыбек Ташиевдин үй-бүлөсү мунай базасын сатканын жана алынган каражаттарды заманбап оорукананын курулушуна жумшаганын маалымдады.
Вице-премьер-министр — ГКНБнын төрагасы Камчыбек Ташиев медициналык мекеменин кызматкерлерине кызматтык турак жай жана батирлер берилээрин, ошондой эле эмгек акы фонду эки эсе көбөйтүлөрүн айтты.
Аягында мамлекет башчысы ооруканага эки тез жардам унаасын, зарыл жабдуулар менен толук камсыздалган түрүндө тапшырды.
