Уюштуруучулардын айтымында, кампаниянын максаты - кыргызстандык аялдардын аттарын коомдук жана тарыхый эстен чыгарбай, мамлекеттүүлүк, билим берүү, маданият жана социалдык тармактардагы жетишкендиктери көп убакыт бою коомчулуктун көңүлүнөн четте калгандыгын кайрадан эске салуу. Өткөн жылы долбоордун командасы ар кандай доорлордон 126 аялдын тарыхын чогултуп, документтештирип, которуп, үй-бүлөлүк архивдерди санариптештирди. Бул материалдар социалдык платформаларда жана башка ММКлар менен кызматташтыкта жайгаштырылды.
Сайтта тарыхтар региондорго жана алардын активдүү ишмердүүлүк жылдарына жараша уюштурулган, ошондой эле издөө жана фильтрация функциялары каралган. Платформа жаңы сунуштарга ачык: каалаган адам жаңы баатырды сунуштап, аны сүрөттөп, архивдик материалдарды атайын форма аркылуу жиберсе болот.
Иш-чаранын программасына Жогорку Кеңештин жаңы чакырылышындагы депутаттардын, мамлекеттик структуралардын өкүлдөрүнүн жана эл аралык өнөктөштөрдүн катышуусунда расмий ачылыш, аялдар кыймылынын тарыхы боюнча интерактивдүү викторина жана уюштуруучулар, изилдөөчүлөр жана долбоордун баатырлары менен жандуу баарлашуу кирди.
КРдин Эмгек, социалдык камсыздандыруу жана миграция министринин орун басары Айнура Орозбаева иш-чарада аялдар лидерлигин колдоо мамлекеттик саясаттын бир бөлүгү экенин, президенттин жарлыгы жана 2030-жылга чейин программасы менен бекитилгенин белгиледи. Ал аялдар лидерлигин өнүктүрүү туруктуу өнүгүү жана социалдык адилеттүүлүккө жетишүү үчүн негизги элемент экенин баса белгиледи.
Уюштуруучулар долбоор боюнча иш жүргүзүү изилдөөчү мүнөзгө гана ээ эмес, ошондой эле аялдардын келечектеги муундар үчүн салымын таануу жана сактоо боюнча маанилүү коомдук демилге болгонун белгилешти.
Иш-чара аялдардын мыйзам чыгаруу демилгелеринин Альянсы тарабынан Швейцариянын өнүктүрүү жана кызматташтык агенттиги (SDC) тарабынан каржыланган "Граждандык катышуу үчүн өнүгүү" долбоорунун колдоосу менен уюштурулду.
