Эмгек министринин орун басары Бакыт Дарманкул уулу коопсуз жана легалдуу эмгек миграциясынын маанисине көңүл бурду, ошондой эле жеке жумушка орноштуруу агенттиктеринин эмгекчилердин укуктарын коргоодогу жана алардын чет өлкөдө жумушка орношуу мүмкүнчүлүктөрүн камсыздоодогу ролун баса белгиледи.
«Мигранттар — бул экономикалык категория эмес, бул адамдардын тагдыры, жана мамлекет алардын укуктары жана коопсуздугу үчүн жоопкерчилик тартат», — деди ал.
Дарманкул уулунун айтымында, кесиптик квалификация чет өлкөдөгү эмгек акынын өлчөмүнө жана үй-бүлөлөргө жөнөтүлгөн акча которууларга түздөн-түз таасир этет. Ар жылы Кыргызстандын болжол менен 100 миң жараны чет өлкөгө жумушка чыгуу алдында кеңеш алуу үчүн кайрылат, анын ичинен 17ден 21 пайызга чейин аялдар түзөт. Бул жагдай алардын корголушу жана коопсуздугу боюнча өзгөчө көңүл бурууну талап кылат.
Мындан тышкары, ал эмгек миграциясы жаатында оң тенденция тууралуу маалымдады. Анын маалыматына караганда, эмгек мигранттарынын саны жумуш орундардын көбөйүшү жана өлкөнүн экономикасынын өнүгүшү менен бирге акырындык менен азайып жатат.
Иш-чаранын соңунда легалдуу эмгек миграциясын өнүктүрүүгө, заманбап стандарттарды киргизүүгө жана кызматтарды санариптештирүүгө кошкон салымы үчүн мыкты жеке жумушка орноштуруу агенттиктери сыйланды.
