Ош шаарынын мэриясынын мүлкүн өткөрүү сунушун депутаттар «Жергиликтүү мамлекеттик башкаруу жана жергиликтүү өз алдынча башкаруу органдары жөнүндө» мыйзамдын 34-беренесине жана «Муниципалдык менчик жөнүндө» мыйзамдын 6-беренесине таянып талкуулашты. Архитектура, курулуш, муниципалдык менчик, экология жана өзгөчө кырдаалдар боюнча туруктуу депутаттык комиссиясынын 2025-жылдын 19-декабрында кабыл алынган 63-номердеги чечими маанилүү учур болду.
Натыйжада, Ош шаардык кенеши муниципалдык менчикке төмөнкү объекттерди кабыл алууга макул болду:
– Кыргызкөмүр акционердик коомуна таандык жер участогу менен имарат, дареги: Ош шаары, Алишер Навои көчөсү, 54;
– Ош облустук балдар-өспүрүмдөр спорт мектебине таандык имарат, дареги: Ош шаары, Алымбек-датка көчөсү, 5/2.
Чечимге ылайык, Ош шаарынын мэриясы мүлктү муниципалдык менчикке өткөрүү үчүн зарыл болгон кадамдарды мыйзамдын талаптарына ылайык аткарууга тийиш.
Бул токтом расмий жарыяланган учурдан тартып күчүнө кирет.
