Жыйында аткаруу өндүрүшүнө байланыштуу бир катар мыйзам актыларына өзгөртүүлөр сунушталды. Жобо жеке сот аткаруучулардын укуктары жана милдеттери, ошондой эле алардын жоопкерчилиги, алименттик милдеттенмелерди аткарбоо боюнча нормаларды камтыйт.
Эгер алимент боюнча келишим же соттун алимент төлөө боюнча чечими аткарылбаса, сот аткаруучу Кодекс боюнча протоколду даярдап, сотко жөнөтүүгө милдеттүү. 12 айдан ашык карыз болсо, материалдар укук коргоо органдарына өткөрүлөт.
Башкы прокурордун орун басары төмөнкү чараларды да белгилеп өттү:
- үч айдан ашык карыз үчүн — үч күнгө камоо;
- бир жыл ичинде кайрадан бузуу болсо — жети күнгө камоо;
- 12 ай бою алимент төлөбөсө — 100дөн 200 саатка чейин коомдук иштер же бир жылга чейин эркинен ажыратуу;
- соттун чечими боюнча кирешелерди жашыруу же жумушка орношуудан качуу 100 миң сомго чейин айып пул же үч жылга чейин эркинен ажыратуу менен жыйынтыкталат.
Кээ бир депутаттар алимент төлөөдөн качкандар үчүн катуу жаза берүү идеясын колдошту. Дастан Бекешев алименттерди жок кылууну жана анын ордуна мамлекеттен балдарга жөлөк пул төлөөнү сунуштап, качып жүргөн ата-энени мамлекет үчүн иштөөгө милдеттендирүүнү сунуштады.
Жыйынтыгында, комитеттин мүчөлөрү мыйзам долбоорун биринчи окууда кабыл алышты.
