«Бийик тоолуу аймактардын жашоочуларына көмөк» деп аталган жөлөк пул, бийик тоолуу жана алыскы айылдарда жашаган үй-бүлөлөргө, ошондой эле өзгөчө статуска ээ айрым чек ара аймактарына берилет. Төртүнчү баланын туулганынан баштап, ар бир кийинки бала үч жашка чыкканга чейин төлөмдөр жүргүзүлөт.
Жөлөк пулдун суммасы айына 3000 сомду түзөт. Бул төлөмдөр үй-бүлөнүн социалдык-экономикалык абалына жараша болбойт жана райондук коэффициентти эске албайт.
Жөлөк пул алуу үчүн арыздарды кабыл алуу январь айында башталат, ал эми биринчи төлөмдөр 2026-жылдын 1-февралында пландалган.
Жөлөк пулду алуу үчүн жергиликтүү социалдык камсыздоо бөлүмүнө арыз берүү керек.
Эмгек министрлигинде Нарын, Талас, Ысык-Көл жана Чүй облустарындагы аймактык башкармалыктардын кызматкерлерине окутуу өткөрүлгөндүгү белгиленди. Окутуунун алкагында Бирдиктүү социалдык камсыздоо системасынын жаңы модулу сунушталып, жөлөк пулду белгилөө тартиби түшүндүрүлгөн.
Кыргыз Республикасындагы мамлекеттик жөлөк пулдар жөнүндө мыйзамга 2024-жылдын 6-декабрында өзгөртүүлөр киргизилгенин белгилеп өтүү керек.
