Декларацияларды тапшыруу процесси эки этапка бөлүнөт: юридикалык жактар жана мамлекеттик, муниципалдык кызматкерлер 1-апрелге чейин декларацияларын тапшыруусу керек, ал эми жеке адамдар жана жеке ишкерлер 1-майга чейин тапшыра алышат.
Декларацияны 1-апрелге чейин тапшырууга тийиш:
– Кыргызстанда катталган уюмдар, бюджеттен каржыланган жана отчеттук мезгилде мүлк салыгы боюнча салык милдеттенмелери жок болгон уюмдардан тышкары;
– Кыргызстанда иш алып барган жана туруктуу өкүлчүлүгү бар чет элдик компаниялар;
– мамлекеттик жана муниципалдык кызматкерлер;
– Судьяларды тандоо боюнча кеңештин мүчөлөрү, Борбордук шайлоо комиссиясынын жана референдумдарды өткөрүү боюнча комиссиясынын мүчөлөрү, ошондой эле Улуттук банктын жетекчилиги.
1-майга чейин декларацияны тапшырууга тийиш:
– жеке ишкерлер (соода аймактарында өзгөчө шарттарда иштегендерди, патент негизинде иштегендерди, ошондой эле бирдиктүү салык 0, 0,1, 0,5 жана 1 пайыз ставкалары боюнча иштегендерди жана юридикалык жак статусуна ээ эмес дыйкан чарбаларын эсепке албаганда);
– Кыргызстанда эл аралык уюмдарда жана чет өлкөлөрдүн дипломатиялык мекемелеринде иштеген жарандар;
– отчеттук мезгилде киреше салыгы кармалбаган киреше алган жеке адамдар.
Социалдык же мүлк боюнча чегерүүлөрдү алуу үчүн декларация тапшырууну каалаган башка жарандар өз ыктыярында декларация тапшыра алышат.
Салык декларациясын берүү «салык төлөөчүнүн кабинети» аркылуу электрондук түрдө Cabinet.salyk.kg сайтында жүргүзүлөт.
Декларацияда кирешелер жана чыгашалар, экономикалык ишмердүүлүк, менчик объектилери, жер участоктору жана отчеттук мезгилдеги төлөнгөн салык суммасы тууралуу маалыматты көрсөтүү маанилүү.
Кошумча маалыматты жергиликтүү салык органдарынан, 116 телефондун номеринен же www.sti.gov.kg сайтынан алсаңыз болот.
