Иш-чарада Инвестициялар боюнча улуттук агенттигинин орун басары Мээримбек Койчуманов катышты. Стабилизациялык режим жөнүндө келишим ОсОО «Солар Системс» жана ОсОО «АСТ Империал» компаниялары менен кол коюлду.
Долбоор Ак-Кудук айылында, Нарын облусунун Кочкор районунда күн электр станциясын жайгаштырууну пландаштырууда. Электр станциясынын пландалган кубаттуулугу 325 МВт, ал эми болжолдонгон инвестициялар 200 миллион долларды түзөт.
Стабилизациялык режимдин кол коюлушу долбоорду ийгиликтүү ишке ашыруу үчүн маанилүү кадам болуп, инвесторлор үчүн туруктуу жана алдын ала болжолдонгон шарттарды камсыз кылып, инвестициялык долбоордун бүткүл мөөнөтүндө укуктук жана экономикалык туруктуулукту кепилдейт.
Бул долбоорду ишке ашыруу өлкөнүн энергетикалык балансында жаңылануучу энергия булактарынын үлүшүн гана жогорулатпастан, Кыргыз Республикасынын энергетикалык коопсуздугун бекемдеп, туруктуу жана экологиялык жактан таза энергетиканын өнүгүшүнө олуттуу салым кошот.
Мындан тышкары, күн электр станциясын куруу региондун социалдык-экономикалык өнүгүүсүнө оң таасирин тийгизип, курулуш жана эксплуатация этаптарында жаңы жумуш орундарын түзүп, Нарын облусуна кошумча инвестицияларды тартат.
