Бул маалымат аймактагы калктын арасында нааразычылыктарды жаратты, деп белгиледи депутат.
Жогорку Кеңештин жыйынында депутат Кубанычбек Самаков Ат-Баши районунун администрациясынан алынган документ тууралуу маалымдады.
Ал 1997-жылдын 27-июнундагы № 377 токтому бар экенин, ага ылайык айылдык аймактардагы эмгек акы коэффициентти эске алуу менен эсептелинерин белгиледи. Бирок 2025-жылдын 23-октябрындагы № 692 токтомунун долбоорунда өзгөртүүлөр сунушталууда.
«Айылдык аймактардагы эмгек акы коэффициентин 1,50ден 1,30га төмөндөтүү пландалууда. Бул Нарын облусунун тургундары арасында, айрыкча Ат-Баши жана Ак-Талаа райондорунда нааразычылыктарды жаратты», - деп баса белгиледи парламентарий.
Ал ошондой эле, бул токтомго өзгөртүүлөрдү киргизүү боюнча расмий маалымат жок экенин кошумчалады.
Мындан тышкары, Самаков курултайда президент медициналык кызматкерлердин эмгек акысын 100 пайызга жогорулатуу ниетин билдиргенин эске салды. Бирок депутат өкмөттүн коэффициентти төмөндөтүүсү жарандардын кирешелеринин азайышына алып келиши мүмкүн экенин билдирип, кооптонууларын билдирди.
