Иш-чаранын биринчи күнүндө белгилүү эксперттер өз билимдери жана тажрыйбалары менен бөлүштү. Улуттук командасынын башкы машыктыруучусу Роберт Просинечки негизги команда менен иштөө спецификасы жана эл аралык деңгээлде ойногон футболчуларга коюлган заманбап талаптар тууралуу айтып берди. Олимпиадалык командасынын (U-23) машыктыруучусу Эдмар де Ласерда жаш оюнчуларды даярдоо боюнча өз тажрыйбасын бөлүштү, ал эми ФИФАнын чакырылган эксперти Рожерио Баррос футбол таланттарын издөө жана өнүктүрүү боюнча заманбап ыкмаларды сунуштады.
Панелдик дискуссиялар программанын борбордук элементине айланды. Катышуучулар жаштарды тарбиялоо, футбол академияларынын ишинин натыйжалуулугун жогорулатуу жана улуттук командаларга тандоонун ачыктыгына байланыштуу негизги маселелерди талкуулашты.
Экинчи күнү КФСтин техникалык директору Дайнис Казакевич заманбап машыгуунун ыкмалары жана өлкөдөгү футболду өнүктүрүүнүн узак мөөнөттүү стратегиясы боюнча доклад жасады. "Суроо-жооп" форматындагы сессиялар регионалдык машыктыруучуларга КФСтин жетекчилиги менен кадрларды даярдоо боюнча актуалдуу маселелерди талкуулоого мүмкүнчүлүк берди.
Конгресс футболчуларды окутуунун заманбап стандарттарын киргизүү жана тажрыйба алмашуу үчүн платформа түзүүнү максат кылды. Учурда Кыргызстанда спорт мектептеринде, клубдарда жана командаларда иштеген 1339 машыктыруучу катталган. Бул форум алардын ишин системалаштырууда жана өлкөнүн футбол инфраструктурасын бекемдөөгө маанилүү кадам болду.
