Кыргыз Республикасынын Транспорт жана байланыш министрлигинде Суусамыр–Талас–Тараз автожолунун IV этапын реконструкциялоо боюнча иштердин жүрүшү тууралуу маалымат берилди.
Маалыматка ылайык, учурда жолдун жабындысын тегиздөө жана кеңейтүү, суу өткөрүү түтүктөрүн көчүрүү, электр өткөргүчтөрүнүн бетон опорлорун демонтаждоо, ошондой эле көпүрөлөрдү куруу боюнча иштер жүргүзүлүүдө.
Проектте 147ден ашык атайын техника жана 229 жумушчу тартылган. Анын алкагында эки асфальт-бетон заводу, бир бетон заводу жана эки майдалоо станциясы орнотулуп, эксплуатацияга берилди.
Реконструкцияланып жаткан участоктун узундугу 93 км, Талас шаарынан башталып, «Кичи-Капка» өткөрмө пунктунда аяктайт. Курулуш иштеринин 2025-2028-жылдар аралыгында аяктай турганы күтүлүүдө, ал эми проекттин кепилдиги 5 жылды түзөт.
«Проекттин алкагында алты көпүрөнү реконструкциялоо, бир жер астындагы өтмөктү куруу, ошондой эле калктуу конуштарда тротуарлар жана жарыктандыруу түзүү пландалууда. Жолдун техникалык категориясы III категориядан II категорияга көтөрүлөт», - деп айтылат маалыматта.
