Караколдо өткөн жыйында билим берүү министринин орун басары Альберт Махметкулов №7 Мендегул уулу Карач акенин атындагы мектептин улук классынын окуучулары менен байланышкан акыркы окуяны талкуулады. Иш-чарага шаардык мэриянын өкүлдөрү, Ысык-Көл облустук билим берүү институтунун директору, ошондой эле билим берүү мекемелеринин жетекчилери, мугалимдер жана шаардык ички иштер бөлүмүнүн кызматкерлери катышты.
Альберт Махметкулов окуя министрдин жеке көзөмөлүндө экенин белгилеп, окуучулардын коопсуздугу билим берүү министрлигинин негизги приоритеттеринин бири экенин кошумчалады.
Ал ошондой эле өлкө боюнча өткөрүлүп жаткан алдын алуу иш-чаралары тууралуу маалымат бөлүшүп, алардын натыйжалуулугун жана камтуусун жогорулатуу зарылдыгына көңүл бурду.
Талкуу учурунда катышуучулар алдын алуу иштерин күчөтүүнүн, балдарды кружокторго жана спорттук секцияларга тартуунун, ошондой эле маданий-массалык жана тарбиялык иш-чараларды активдештирүүнүн маанилүүлүгүн белгилешти. Мындан тышкары, мектеп психологдорунун жана коомдук педагогдордун санын көбөйтүү сунушталды.
