Ош жана Ярославль шаарлары эки тараптуу мамилелерди бекемдөө жана өнүктүрүү боюнча Протоколго кол коюшту
Ош «Этностор аралык мамилелер» номинациясында жеңүүчү болду
11-апрель, Бишкекте «Эң мыкты муниципалдык практикалар» юбилейдик V эл аралык форуму башталды.
Форумдун алкагында Кыргызстандын Ош шаарынан мэр Айтмамат Кадырбаев жана Россиянын Ярославль шаарынан мэр Протоколго кол коюшту, анда эки тараптуу мамилелерди өнүктүрүү жана чыңдоо боюнча ниеттер белгиленди, анын ичинде маданий, гуманитардык, экономикалык кызматташуу багыттары боюнча эки шаар үчүн кызыкчылыктарды эске алуу менен.
А.Кадырбаевдин айтымында, эки тараптуу мамилелерди чыңдоо алкагында 2018-жылы биргелешкен долбоорлорду жана жалпы маданий иш-чараларды ишке ашыруу пландалууда.
«Кол коюлган Протоколдун алкагында инвестиция рыногу, туризмди өнүктүрүү, элдик өнөрчүлүктү колдоо, билим берүү, маданият, социалдык маанилүү тармактардагы иш-чаралар пландалууда. Мындан тышкары, тажрыйба алмашуу алкагында ишкерлер, бизнес чөйрөсүнүн өкүлдөрү, социалдык сферанын мекемелери, анын ичинде билим берүү жана маданият тармагында бизнес байланыштарды орнотуу үчүн жардам көрсөтүлөт», - деди ал.
Ошондой эле мэр шаар башчылыгы шаардыктарга эки шаардагы маданиятка кеңири жеткиликтүүлүктү камсыз кылууга, биргелешкен иш-чараларга, анын ичинде билим берүү конгрессине, туристтик форумдарга, көргөзмөлөргө, ярмаркаларга, бизнес жолугушууларга, чыгармачылык фестивалдарына жана башка иш-чараларга катышууга даяр экенин белгиледи.
Мындан тышкары, Кыргызстандын башка шаарларынын муниципалитеттеринин жетекчилери да чет өлкөдөгү шерик шаарлар менен өнүктүрүү боюнча келишимдерге кол коюшту.
Форумга дүйнөнүн 150 шаарынан 250дөн ашык муниципалитеттердин жана жергиликтүү өз алдынча башкаруу органдарынын өкүлдөрү катышууда, анын ичинде Ош шаарынан делегация бар. Форумдун алкагында шаар башкаруусу боюнча кеңири маселелерди камтыган тематикалык секциялар өткөрүлөт: экономика, финансылык, бюджеттер аралык мамилелер, инвестициялык климат, турак-жай-коммуналдык чарба, социалдык саясат, экология, маалыматтык технологиялар, эл аралык ишмердүүлүк, конфессиялар аралык жана этностор аралык мамилелерди жөнгө салуу, ошондой эле шаарлардын маданий өзгөчөлүгү жана идентификациясы.
