Бүгүн Бишкекте Кыргыз Республикасынын табигый ресурстар, экология жана техникалык көзөмөл министринин Германиянын эл аралык кызматташтык коомдоштугунун (GIZ) өкүлдөрү менен жолугушуусу өттү.
Министрликтин маалымат кызматынан алынган маалыматка караганда, Германиянын Федералдык экономика жана климатты коргоо министрлиги тарабынан каржыланган «Жашыл шаарлар» регионалдык долбоорун ишке ашыруу маселелери талкууланды.
Бул долбоор үч өлкөнү камтыйт: Кыргызстан, Тажикстан жана Өзбекстан, ал эми Кыргызстан тараптан негизги өнөктөш - Табигый ресурстар, экология жана техникалык көзөмөл министрлиги.
Долбоордун максаты - эл аралык жана регионалдык кызматташтыкты өнүктүрүү, жашыл шаардык өнүгүү боюнча алдыңкы практикаларды алмашуу, ошондой эле институттук потенциалды жогорулатуу жана шаарлардын туруктуу өнүгүшү үчүн мастер-план түзүү. Бул демилгени ишке ашыруу алкагында катышуучу өлкөлөрдүн шаарлары арасында тажрыйба алмашуу, климаттык чечимдерди иштеп чыгуу жана экологиялык процесстерди башкарууда заманбап ыкмаларды киргизүү боюнча иш-чаралар пландалууда.
Жолугушуунун катышуучулары «Жашыл шаарлар» долбоорунун алкагында Кыргыз Республикасында туруктуу жана экологиялык жактан коопсуз шаардык чөйрөнү түзүүгө багытталган конкреттүү иш-чараларды ишке ашырууну улантууга ниеттеништи.
