Кыргыз Республикасынын президентинин тоо өнүгүү маселелери боюнча атайын өкүлү Динара Кемелова, Кыргызстандын тоо региондорун туруктуу өнүктүрүү, климаттын өзгөрүшүнө каршы күрөшүү жана глобалдык тоо маселелери боюнча эл аралык кызматташтыкты бекемдөө максатында Түштүк Кореяга барды.
Визит учурунда Азиаттык орман кызматташтык уюмунун (AFOCO) аткаруучу директору Пак Чон Хо менен, ошондой эле Глобалдык жашыл өсүү институтунун (GGGI) жетекчиси Ким Санг Хёп жана жашыл климат фонду өкүлдөрү менен натыйжалуу консультациялар болду. Алар Кыргызстандагы тоо аймактарын өнүктүрүү боюнча 2023-2027-жылдарга карата Тоо региондорун өнүктүрүүнүн беш жылдыгынын алкагында ишке ашырылуучу долбоорлорду талкуулашты.
Ошондой эле Динара Кемелова Корея Республикасынын Тышкы иштер министрлигинин климаттын өзгөрүшү боюнча министринин орун басары жана элчиси Кюн Чон Хо, ошондой эле Кореянын Орман чарба кызматташтык бюросунун башкы директору Нам Сонг Хи менен жолугушуулар өткөрдү.
Кемелова Кыргызстан эл аралык аренада тоо жана климат маселелери боюнча маанилүү прогресске жеткенин, 2026-жылы БУУнун РКИК алкагында бул маселелер боюнча диалог өткөрүүнү белгиледи. Бишкекте Тоо региондорунун туруктуулугун камсыздоо боюнча Глобалдык борборду түзүү идеясы сунушталды, ошондой эле Корея Республикасынан бул баштамага катышуу мүмкүнчүлүгүн карап чыгуу өтүнүчү айтылды.
Талкуу ошондой эле тоо аймактарындагы экосистемаларды калыбына келтирүүгө, табигый кырсыктарга каршы күрөшүүгө, жердин деградациясы, климаттын өзгөрүшү, тоо продукциясын бренддөө жана тоо мамлекеттеринин институционалдык потенциалын күчөтүүгө багытталган биргелешкен долбоорлорду ишке ашыруу маселелерин камтыды.
Мындан тышкары, Динара Кемелова «Глобалдык жана регионалдык тоо диалогун илгерилетүү: Бишкек+25 Экинчи Глобалдык тоо саммитине» темасындагы тегерек столго катышты. Бул иш-чара «Центральная Азия – Корея» кызматташтык форумунун секретариаты менен биргеликте уюштурулган. Бул иш-чарага Корея Республикасынын мамлекеттик органдарынын жана бизнес өкүлдөрү, ошондой эле AFOCO, GGGI жана ЮНЕСКО сыяктуу эл аралык уюмдардын өкүлдөрү катышты. Мындан тышкары, Сеул улуттук университетинин Евразия жана Борбордук Азияны изилдөө борборунда тоо маселелери сунушталды.
