БУУнун жаңылыктар кызматынын маалыматына ылайык, өткөн жылдардагы гуманитардык каржылоонун чоң көлөмдөрүнө карабастан, 2016-жылдан бери азык-түлүк жетишсиздигин сезген адамдардын саны үч эсе өстү.
Фермерлерди колдоо жана алардын азык-түлүк өндүрүүнү улантууга мүмкүнчүлүк берүү туруктуулуктун маанилүү элементи болуп саналат.
«Азык-түлүк жетишсиздиги менен бетме-бет келген адамдардын 80 пайыздан көбү айыл жергесинде жашайт жана айыл чарба, мал чарба, балык уулоо же токой чарбасына көз каранды. Бирок гуманитардык жардамдын 5 пайыздан азы азык-түлүк жардамын айыл чарбага колдоо үчүн бөлүнөт. Жергиликтүү өндүрүштү күчөтүү калктын тамак-ашка жеткиликтүүлүгүн гана жакшыртпастан, жергиликтүү экономиканын өнүгүшүнө, жумуш орундарын түзүүгө жана социалдык туруктуулукту бекемдөөгө да жардам берет, өзгөчө узак мөөнөттүү кризисти башынан өткөрүп жаткан өлкөлөрдө», — деп белгиленет ФАОнун билдирүүсүндө.
Уюм өзгөчө кырдаалдарда айыл чарбаны алдын ала колдоо жана оперативдүү чараларды көрүүнүн зарылдыгына көңүл бурат.
Тиимдүү чечимдердин арасында урук бөлүштүрүү, малды вакцинациялоо жана дарылоо, негизги инфраструктураны калыбына келтирүү, фермерлерге зарыл инструменттерди берүү, акча төлөмдөрү жана базарлардын иштешин колдоо сыяктуу чаралар бар.
Изилдөөлөр көрсөткөндөй, кризис башталгандан мурун айыл чарба өндүрүшүн коргоого инвестицияланган ар бир доллар, жоготуулардын алдын алуу жана келечектеги гуманитардык жардамга болгон муктаждыктарды азайтуу аркылуу 7 долларга чейин пайда алып келиши мүмкүн.
ФАОнун келерки жылга глобалдык чакырыгы 60 миллион адамга дүйнө жүзү боюнча чукул жардам көрсөтүү үчүн 1,5 миллиард доллар бөлүүнү, ошондой эле 43 миллион адам үчүн туруктуулукту камсыздоого багытталган программалар үчүн 1 миллиард доллар бөлүүнү камтыйт. Бул туруктуу чечимдер климаттын өзгөрүшүнө адаптациялоо үчүн технологияларды киргизүү, суу инфраструктурасын түзүү, базарларга жеткиликтүүлүктү жакшыртуу жана агроазык-түлүк системаларын калыбына келтирүүнү камтыйт.
