Бишкекте Кыргыз Республикасынын президентинин алдындагы Улуттук инвестиция агенттигинин жетекчиси Равшанбек Сабиров менен инвестиция жана өнүктүрүү менен алектенген эл аралык Vantagion terra group limited компаниясынын өкүлдөрүнүн ортосунда жолугушуу өттү. Агенттиктин басма сөз кызматы сүйлөшүүлөрдүн жүрүшү тууралуу маалымат берди.
Күн энергиясы тармагында кызматташуу мүмкүнчүлүктөрүн талкуулоо жана Кыргызстандагы тоолуу жана жеткиликтүү эмес аймактарда долбоорлорду ишке ашыруу маселелери күн тартибинде болду.
Равшанбек Сабиров кайра жаралуучу энергия булактарын өнүктүрүү мамлекеттик инвестициялык саясаттын маанилүү багыты болуп кала берерин белгиледи. Ал ошондой эле Кыргызстан электр энергиясына жеткиликтүүлүк чектелген аймактарда туруктуу жана жогорку технологияларды киргизүү үчүн ишенимдүү эл аралык өнөктөштөрдү тартууга кызыкдар экенин баса белгиледи.
Vantagion terra group limited кайра жаралуучу энергия тармагына багытталган эл аралык платформа болуп, күн жана шамал электр станцияларын куруу жана эксплуатациялоодон инвестициялоого чейинки толук циклды ишке ашырат.
Жолугушуунун жыйынтыгында эки тарап кызматташтыкты улантууга жана Кыргыз Республикасында жашыл энергетика тармагында конкреттүү долбоорлорду талкуулоого даяр экенин билдиришти.
