Кыргыз Республикасында Италиядан технологияларды колдонуп, катуу үй-бүлөлүк калдыктарды кайра иштетүүчү завод куруу пландалууда. Бул долбоор улуттук инвестиция агенттиги менен италиялык TRITOR компаниясынын ортосундагы өз ара түшүнүшүү меморандуму кол коюлган жыйындын жүрүшүндө талкууланган. Долбоорго күтүлүп жаткан инвестициялар 10-12 миллион евро аралыгында болот.
Кеңейтилген жыйынга Бишкек, Ош, Каракол, Токмок жана Кара-Балта шаарларынан мамлекеттик структуралардын жана жергиликтүү өз алдынча башкаруу органдарынын өкүлдөрү катышты.
Италия делегациясынын визити учурунда Токмок жана Кара-Балта шаарларында заводду жайгаштыруу үчүн полигондор сунушталды. Италия тарап 30 жылга чейин өз ара пайдалуу шарттарда жер участогун узак мөөнөткө ижарага алуу кызыгуусун билдирди.
Тараптар ошондой эле Чүй облусундагы медициналык мекемелердин бирине медициналык калдыктарды кайра иштетүү үчүн жабдууларды жеткирүү мүмкүнчүлүгүн талкуулашты. Бул жабдуулардын болжолдуу баасы 700 миң долларды түзөт. Италиялык компания долбоордун социалдык маанисин эске алуу менен жеткирүү боюнча атайын шарттарды карап чыгууга даяр экенин билдирди.
Учурда инвестициялык келишимди даярдоо боюнча консультациялар улантылууда.
Улуттук агенттик ошондой эле италиялык бизнес өкүлдөрү менен бир нече жыйындарды өткөрдү. Айрыкча, помидор өндүрүү боюнча адистешкен Valli Estensi компаниясы менен маселелер талкууланды. Италиялык өнөктөштөргө Кыргызстандын инвестициялык мүмкүнчүлүктөрү, анын ичинде агроөнөр жай сектору тууралуу маалымат берилди.
Атайын жумушчу жыйында Unimpresa компаниясынын өкүлдөрү катышып, мүмкүн болгон кызматташтык багыттары жана бизнес өнөктөштүк форматтары талкууланды.
Мындан тышкары, Казакстандагы Италия элчилигинин орун басары, Италиялык компанияларды илгерилетүү жана интернационалдаштыруу агенттигинин директору, ошондой эле Италия элчилигинин консулдук бөлүмүнүн өкүлдөрү катышкан сүйлөшүүлөр болду. Италия тарап Кыргызстан Италия үчүн 15 приоритеттүү өлкөнүн бири экенин жана экономикалык кызматташтыкты тереңдетүүгө кызыкдар экенин билдирди.
Ошондой эле Борбордук Азия - Италия форматында бизнес-форум өткөрүү боюнча демилге талкууланды. Кыргыз тарап бул иш-чараны даярдоодо жана уюштурууда жардам берүүгө даяр экенин билдирди.
Улуттук агенттик Италиянын соода жана инвестициялар агенттиги, ошондой эле FederUnacoma ассоциациясы сыяктуу профилдик өнүктүрүү институттарына кайрылууларды баштады жана кызыкдар компаниялар менен тематикалык онлайн-сүйлөшүүлөрдү өткөрүүнү сунуштады.
