Дохада, Экинчи Дүйнөлүк социалдык өнүгүү саммитинде Кыргыз Республикасынын Эмгек, социалдык камсыздоо жана миграция министри Канат Сагынбаев менен Катар мамлекетинин Социалдык өнүгүү жана үй-бүлө министри Бутайна бинт Али Аль Джабр Аль Нуайминин ортосунда жолугушуу өттү. Бул иш-чаранын жүрүшүндө социалдык камсыздоо тармагындагы актуалдуу маселелер, анын ичинде социалдык коргоо механизмдери, уязвимдүү топторду колдоо жана үй-бүлөнүн коомдогу негизги элемент катары мааниси талкууланды.
Канат Сагынбаев катар тарапка жылуу кабыл алуу жана жолугушууну уюштурганы үчүн ыраазычылык билдирди, Кыргызстан Катар менен гуманитардык жана социалдык өз ара аракеттешүүнү өнүктүрүүгө багытталганын белгиледи.
Социалдык саясат, социалдык кызматтарды цифрлаштыруу жана балдары бар үй-бүлөлөрдү колдоо, ошондой эле мүмкүнчүлүктөрү чектелген адамдарды реабилитациялоо жана кесиптик даярдоо боюнча тажрыйба алмашуу үчүн олуттуу потенциал талкууланды.
Тараптар ошондой эле аялдар жана балдарды коргоо, үй-бүлөдөгү зомбулукка каршы күрөшүү жана жаштарды жумушка орноштуруу мүмкүнчүлүктөрүн кеңейтүү боюнча кызматташуунун маанисине көңүл бурушту.
Министр Сагынбаев министрликтер арасында институттук байланыштарды орнотууну сунуштап, социалдык саясаттын негизги багыттары боюнча системалуу өз ара аракеттешүүнү камсыз кылуучу өз ара түшүнүшүү Меморандумун түзүү мүмкүнчүлүгүн карап чыгууга чакырды.
Бутайна бинт Али Аль Джабр Аль Нуайми Катар тараптын өнөктөштүктү күчөтүүгө даяр экенин белгилеп, жарандардын жашоо сапатын жакшыртууга багытталган мыкты практикаларды алмашуу жана биргелешкен демилгелерди ишке ашыруунун маанилүүлүгүн белгиледи.
Жолугушуунун соңунда тараптар жетишилген макулдашууларга канааттануу билдирип, социалдык укуктарды коргоо жана калктын жашоо деңгээлин жогорулатууга багытталган кызматташтыкты улантууга даяр экенин белгилешти. ```
