2025-жылдын 12-ноябрында Бишкекте Кыргыз Республикасынын Тышкы иштер министрлиги жана Швейцариянын Федералдык тышкы иштер департаменти ортосунда саясий консультациялар өттү. Маалыматка ылайык, кыргыз делегациясын Тышкы иштер министринин орун басары Медер Абакиров жетектесе, швейцар делегациясын Мамлекеттик катчынын орун басары, Евразия департаментинин директору Пьер-Ив Фюкс жетектеген.
Жолугушуунун жүрүшүндө эки тараптуу кызматташтык маселелери, соода-экономикалык, инвестициялык жана суу-энергетикалык аспекттерге өзгөчө көңүл бурулду.
Делегация башчылары жогорку деңгээлдеги саясий диалогду активдештирүүнүн жана укуктук базаны кеңейтүүнүн зарылдыгын белгилешти. Ошондой эле келерки жылга пландалган визиттер жана иш-чаралар тууралуу сөз болду.
Тараптар 2022-2025-жылдар аралыгында ийгиликтүү ишке ашырылып жаткан кызматташтык программасын улантууга кызыктар экендиктерин билдиришти, ал экономикалык жана социалдык долбоорлорду ишке ашырууга багытталган.
Мындан тышкары, жолугушуунун катышуучулары Кыргызстан менен Швейцариянын эл аралык уюмдардагы, мисалы, БУУ жана ОБСЕдеги өз ара аракеттенүүсүн оң баалашты. Медер Абакиров швейцар тарапка БУУ структураларында Кыргызстандын демилгелерин колдоону өтүндү.
Тараптар актуалдуу эл аралык маселелер боюнча пикир алмашышты.
