Трамптын адвокаттары өз арызында Би-би-синин коммерциялык мыйзамдарды бузганын, анын колдоочулары Капитолийди штурмдаган күнү анын сөздөрүн атайылап бурмалап көрсөтүшкөнүн билдиришет. Би-би-синин жетекчилиги арыз боюнча азырынча комментарий берген жок.
Ноябрь айында Би-би-си Трампка анын сөздөрүн редакциялаганы үчүн кечирим сураган, бирок анын компенсация талаптарын четке каккан, клевета боюнча айыптоолор үчүн негиз жок экенин белгилеген. Ошол учурда Трамп журналисттерге: «Мен бул зарыл деп эсептейм. Алар менин сөздөрүмдү өзгөртүштү» деп билдирген. Ал ошондой эле компанияга соттук териштирүү мүмкүнчүлүгү жөнүндө эскертүү менен кат жөнөткөн.
Анын сөздөрүнүн монтажы боюнча чыр Майкл Прескотттун, Би-би-синин редакциялык стандарттар комитетинин мурдагы көз карандысыз кеңешчиси, кызматтык жазуусунун жарыяланышы менен башталган. Ал Panorama программасында Трамптын сөздөрү ошондой көрсөтүлгөнүн, алардын мааниси бурмаланганын белгилеген.
2021-жылдын 6-январында Трамп: «Биз Капитолийге барабыз жана биздин кайраттуу сенаторлорубузду жана конгрессмендерибизди колдойбуз» деп билдирген. 50 мүнөттөн кийин ал: «Биз күрөшөбүз. Бардык күчүбүз менен күрөшөбүз» деп кошумчалаган. Бирок өткөн жылы көрсөтүлгөн Panorama Trump: A Second Chance? («Трамп: Экинчи мүмкүнчүлүк?») программасында анын сөздөрү мындай монтаждалган: «Биз Капитолийге барабыз… жана мен сиздер менен барам. Биз күрөшөбүз. Бардык күчүбүз менен күрөшөбүз». Бул Трамптын зордук-зомбулукка чакырып жаткандай таасир калтырган, муну Би-би-си кийинчерээк моюнуна алган.
9-ноябрда Би-би-синин башкы директору Тим Дэйви жана BBC News директору Дебора Тернесс бул чырдын фонуна байланыштуу кызматтан кетишкен. Трамп арызын берерден мурун, Би-би-синин юристтери анын айыптоолоруна жооп берип, монтаждын жаман ниетте эмес экенин жана Трампка зыян келтирбегенин, анткени ал фильм эфирге чыккан соң жакында эле шайлоону утуп алганын белгилешкен.
Адвокаттар ошондой эле Би-би-синин америкалык каналдарда программаны көрсөтүүгө укугу жок экенин жана аны болгону өзүнүн iPlayer стриминг кызматында, Британияда гана көрсөтүп жатканын билдиришкен. Арызда Флоридадагы тургундар бул фильмди VPN аркылуу же Британиянын BritBox стриминг кызматында көрө алышы мүмкүн экени айтылат. Ошол эле учурда Трамптын адвокаттары Би-би-синин башка медиа корпорациясы менен келишими болгонун, анын ал фильмди Британиядан тышкары таратууга укугу бар экенин билдиришет. Азырынча Би-би-си же бул корпорация бул билдирүүгө комментарий берген жок.
