Кыргызстандын борбору Бишкекте жаңы «Бишкексельмаш» жылуулук борборунун ачылыш аземи өттү, ага шаар мэри Айбек Джунушалиев катышты.
Иш-чарада мэр бул объекттин шаар тургундары үчүн маанилүүлүгүн баса белгиледи.
«Бул жылуулук борбору шаардыктарга ишенимдүү, экономикалык жактан эффективдүү жана экологиялык жактан коопсуз жылуулук менен камсыздайт», — деди ал.
Мындан тышкары, Джунушалиев «Бишкектеплоэнерго» кызматкерлерине кайрылып, бул долбоорду ишке ашыруудагы салымдарын белгиледи:
«Бүгүн биз сиздердин эмгегиңиздердин аркасында шаар үчүн маанилүү объектти ишке киргизип жатабыз. Мен ар бириңизге чын жүрөктөн ыраазычылык билдиргим келет».
1974-жылы курулган жана МП «Бишкектеплоэнерго» башкаруусундагы жылуулук борбору этап-этабы менен модернизацияланып жатат. Бул реконструкциянын максаты — техникалык жоготууларды азайтуу, жылуулук камсыздоонун ишенимдүүлүгүн жакшыртуу жана жылуулук энергиясынын баасын төмөндөтүү. Мурда жоготуулар 50% га жеткен. Долбоордун жалпы баасы болжол менен 206 миллион сомду түзөт, анын ичинен 200 миллион сом Кыргыз Республикасынын Стабилизациялык фондунан бөлүнгөн.
Алгачкы этапта жылуулук борбору 13 миң абонентти жылуулук жана ысык суу менен камсыздайт.
Кызыктуусу, казандарды орнотууну «Бишкектеплоэнерго» кызматкерлери өздөрү жүргүзүштү.
Алгачкы этапта ар биринин кубаттуулугу 10 МВт болгон алты газ казаны орнотулду. Алар ишке киргизилгенден кийин жылуулук энергиясынын баасы 6 679,78 сомдон болжол менен 5 500 сомго чейин, жаңы абоненттерди кошуу менен 5 000 сомго чейин төмөндөйт.
Экинчи этапка кошумча казандарды орнотуу жана жылуулук тармактарын кеңейтүү кирет, ал эми үчүнчү этапта 100 МВт кубаттуулуктагы когенерациялык установка жана 110 кВ подстанциясы куруу пландалууда.
Мэриянын пикири боюнча, «Бишкексельмаш» жылуулук борборунун реконструкциясы Бишкектин жылуулук камсыздоо системасын модернизациялоодо жана анын энергетикалык эффективдүүлүгүн жакшыртууда маанилүү кадам болот.
