Германиянын Коргоо министрлигинин маалыматына ылайык, 15-17-январь күндөрү Даниянын чакыруусу боюнча чалгындоо миссиясы өтөт. "Миссия Даниянын региондогу коопсуздук маселелеринде, атайын деңиз байкоо жаатында аскердик катышуунун мүмкүнчүлүктөрүн изилдөөгө багытталган", - деп такталган министрликтен.
Бул миссиянын алкагында Германиядан Гренландияга 13 аскер кызматкери жөнөтүлөт, алар 15-январь күнү Airbus A400M жүк учагы менен Нуук шаарына учуп кетишти. Норвегия эки жоокер жиберет, бул тууралуу өлкөнүн коргоо министри Торе Сандвик билдирген. Швеция дагы бир нече офицер жиберүүнү пландаштырууда, бул тууралуу премьер-министр Ульф Кристерссон билдирди.
Мындан тышкары, Гренландияга Франциянын өкүлдөрү жөнөтүлүүдө. Politico маалыматтарына ылайык, Нидерланд жана Канада аскерлери да машыгууларга катышууда.
Эскерте кетсек, Америка Кошмо Штаттары Венесуэланын президенти жана анын жубайын кармоо боюнча атайын операция өткөргөндөн кийин, Дональд Трамп башка өлкөлөргө, анын ичинде Гренландияга каршы аракет көрүшү мүмкүн экенин билдирген. Гренландияны башкарган Дания мындай билдирүүлөргө нааразычылыгын билдирген. Бул пикирди көптөгөн мамлекеттер, анын ичинде Кытай да колдогон. Бирок, Трамп өз планына өзгөртүү киргизген жок - алгач атайын бөлүктүн командирлерине Гренландияга мүмкүн болгон басып кирүү планы боюнча тапшырма бергендиги тууралуу маалыматтар пайда болду. Андан кийин республикачы Рэнди Файн Америка Кошмо Штаттарына Гренландияны кошуу жана ага штат статусун берүү боюнча мыйзам долбоорун Конгресске сунуштады.
