Окуя учак Hercules С-130 Пуэрто-Легисамо базасынан, Перунун чек арасында, учуп чыкканынан кийин көп өтпөй болду, деп билдирди колумбия армиясынын басма сөз катчысы. Мамлекеттик аба күчтөрүнүн командири Карлос Фернандо Сильва Руэда учакта 114 аскер кызматкери жана 11 экипаж мүчөсү болгонун тактады.
Колумбиянын президенти Густаво Петро 77 жабырлануучунун ооруканаларга жеткирилгенин, ал эми 43 адамдын азырынча дайынсыз жоголгонун билдирди.
Куткаруу иштеринин жүрүшү уланууда: куткаруучулар учактын калдыктарын изилдеп, кырсык болгон жерди текшерүүдө.
Колумбиянын коргоо министри Педро Санчес учакта аскер кызматкерлеринин бар экенин тастыктап, учак аэродромдон болгону 1,5 чакырым алыста кулаганын билдирди. Ал ошондой эле учактын ичинде өрт чыккандыктан, курал-жарактардын жарылуусу болгонун белгиледи. Министрдин айтымында, бул аймакта куралдуу топтордун чабуулу боюнча белгилер жок.
Массалык маалымат каражаттары окуя болгон жерден жергиликтүү тургундардын жаракат алган аскерлерге жардам берип, аларды мотоциклдер менен ооруканаларга алып бараткан сүрөттөрдү жана видеолорду жарыялашууда.
Густаво Петро X тармагында билдирүүсүндө кырсыктын себеби "бюрократиялык көйгөйлөр" экенин, бул аскердик техниканы, анын ичинде учактарды жаңылоону кыйындатканын белгиледи. Ал жаштардын өмүрүн сактоо зарылдыгына басым жасап, кечигүүлөрдү болтурбоого убада берди.
Февралда америкалык өндүрүштөгү C-130 Hercules учагы Боливияда акча ташып бара жатып кырсыкка учураган.
Путумайо аймагынын губернатору каза болгондордун арасында кеминде 34 адам бар экенин тастыктады. Бирок аскерлерден алынган маалыматка ылайык, AFP агенттиги жалпы курмандыктар саны 66га чейин жетиши мүмкүн экенин, анын ичинде 58 аскер, алты аба күчтөрүнүн кызматкери жана эки полиция кызматкери бар экенин билдирүүдө.
