Табигый ресурстар министрлигинин маалымат кызматына ылайык, Ат-Башы районунда эки тоо теке мыйзамсыз атып алынган. Бул окуя Нарын облустук экологиялык жана техникалык көзөмөл кызматынын инспекторлору тарабынан өткөрүлгөн рейд учурунда катталган.
Рейд оперативдик маалыматтардын негизинде уюштурулуп, Ат-Башы районундагы Босого жайлоосунда өткөн. Текшерүү учурунда инспекторлор жергиликтүү тургун Б.Ш.нын мыйзамсыз аңчылык кылгандыгы тууралуу фактыларды аныкташкан, ал окуя болгон жерде кармалган.
Окуя боюнча чогултулган материалдар Ат-Башы райондук ички иштер бөлүмүнүн тергөө бөлүмүнө өткөрүлүп, кылмыш иши козголгон. Учурда окуянын бардык жагдайларын аныктоо жана кармалган адамдын аракеттерине юридикалык баа берүү боюнча тергөө иштери улантылууда.
Министрлик, бийик тоолуу райондордо браконьерлик учурларын алдын алуу, сейрек кездешүүчү жаныбарларды коргоо жана жайлоодо браконьерлик тобокелдиги жогорулаган учурда көзөмөлдү күчөтүү максатында рейддер улантыларын белгилейт.
