Бул экспедициянын инициатору, геоэколог Абдижапар Аккуловдун айтымында, изилдөөлөрдүн жүрүшүндө көптөгөн керамикалык фрагменттер, кол менен майдалоочу таштар («жаргылчак») жана петроглифтер, башкача айтканда, таштарга чегилген сүрөттөр табылган. Керамика алдын ала баалоолор боюнча эрте темир доорго таандык, ал эми петроглифтер дотюрк дооруна (биздин заманга чейин VI кылымга) таандык.
«Бул табылгалар илимий жактан чоң мааниге ээ жана аймактын байыркы маданиятын жана чарбалык ишмердүүлүгүн изилдөө үчүн маанилүү булак болуп саналат. Жакын арада биз эстеликтин паспортун даярдоону пландап жатабыз жана аны Маданият, маалымат, спорт жана жаштар саясаты министрлигинин тарыхый жана маданий объекттердин Реестрине киргизүүнү сунуш кылабыз», — деп кошумчалашты ОшГУдан.
Илиймдер тобунун курамында геоэколог Абдижапар Аккулов, тарых илимдеринин кандидаттары Сабыр Арстанов жана Салтанат Алишер кызы, Кыргызстандын тарыхы жана археология кафедрасынын доценттери, ошондой эле аспирант Куттубек Орунбай уулу иштешти. Экспедицияга жергиликтүү тургундар жана орман чарбасынын кызматкерлери да катышты.
Абдижапар Аккулов, 2025-жылдын февралында жергиликтүү активисттердин чакыруусу менен бул аймакта биринчи жолу болгонун белгиледи. Ал ошол учурда уникалдуу орман массивдеринин жана жайлоолордун абалын изилдеп, Ош орман чарбасынын өкүлдөрү менен климаттык өзгөрүүлөргө ылайыкташуу боюнча эксперименталдык иштерди жүргүзүү мүмкүнчүлүгүн талкуулаган. Ошол учурда ал байыркы жашоо жайларынын жана курулуштардын издерин байкаган.
Эксперттердин пикири боюнча, кийинки комплекс изилдөөлөр түштүк Кыргызстан тарыхында жаңы барактарды ачышы мүмкүн. Шут жайлоосунун уникалдуу табигый ландшафтынан улам, бул аймак экологиялык жана тарыхый туризмди өнүктүрүү үчүн чоң потенциалга ээ.
