Анын айтымында, акыркы эки жылда ГИК өзүнүн турак жай программасын ишке ашырууда мыкты жыйынтыктарды көрсөтүп келет.
«Компания 2016-жылы негизделген жана башында өнөктөш банктар аркылуу иштеген, алар талаптарга жооп берген арыздарды каржылоого берүү же баш тартуу боюнча чечимдерди кабыл алышкан. Бирок 2022-жылдын аягына чейин болгону 9 миң үй-бүлө бул программадан пайдалана алды. Бул маселеге жооп катары өлкө башчылыгы ипотекалык саясатты кайра карап чыгуу чечимин кабыл алды. 2023-жылдын башынан тартып биз көп кабаттуу үйлөрдү өз алдынча курууга кириштик, бул 4,6 миң батир берүүгө мүмкүнчүлүк берди», — деди Гулзат Тотубаева.
Ал ошондой эле көптөгөн жарандар 2020 жана 2021-жылдардан бери турак жай үчүн кезекте турганын жана кырдаал өзгөрбөй жатканын белгиледи.
«Кырдаал 2023-жылы гана объектилердин курулушу башталгандыгы менен байланыштуу, ал эми биринчи батирлерди 2024-жылдын декабрынан тартып бере баштадык. Ошондуктан 2026-жылы кезек кыйла ылдам жылыйт. Жалпы өлкө боюнча 40 миң батир берүү пландалып жатат, анын ичинде Бишкекте 4 миңден ашык батир», — деп кошумчалады ал.
