Ош облусунда 21-декабрда аңчылык эрежелеринин сакталуусун камсыздоо максатында рейд өткөрүлдү. Бул тууралуу Табигый ресурстар, экология жана техникалык көзөмөл министрлиги маалымдады.
Арнайы корголуучу табигый аймактар жана биологиялык ар түрдүүлүк башкармалыгынын кызматкерлери, «NABU Кыргызстан» коомдук уюмунан «Барс-2» тобунун өкүлдөрү менен биргеликте Кара-Суй жана Алай райондорундагы аңчылык жерлеринде текшерүү жүргүзүштү. Иш-чаранын негизги максаты жарандардын аңчылык нормаларын сактагандыгын текшерүү болду.
Рейддин натыйжасында Кыргыз Республикасынын өкмөтүнүн токтомун бузган үч жаран кармалды. Аларга укук бузуулар кодексинин 263-беренесине ылайык үч административдик протокол түзүлдү, жана ар бир бузуучуга 12 миң 500 сом өлчөмүндө айып пул салынды, жалпы суммасы 37 миң 500 сомду түзөт.
Мындан тышкары, рейд учурунда жергиликтүү тургундар жана аңчылар менен сүйлөшүүлөр болуп, аңчылык, жапайы табиятты коргоо жана табигый ресурстарды рационалдуу пайдалануу боюнча мыйзамдардын сакталуусунун маанилүүлүгүнө көңүл бурулду.
Мындай иш-чаралар биологиялык ар түрдүүлүктү коргоо, укук бузууларды алдын алуу жана табигый ресурстарды сактоо максатында туруктуу өткөрүлө тургандыгы белгиленди.
