Талас шаарындагы 6-класстын окуучусу Раяна Бекинова жана Кок-Ой айылындагы 2-класстын окуучусу Асанали Рыспаев ички иштер министри Улан Ниязбековго кат жазышты. Алар өз каттарында министрди келе жаткан Жаңы жыл менен куттукташып, өз кыялдары тууралуу айтып беришти жана келечекте милиция кызматкери болуп, өлкөсүнө кызмат кылууга ниеттенишип, жакшы окууга убада беришти.
Балдар үчүн кубанычтуу жаңылык — алар Талас облусунун Ички иштер башкармалыгына экскурсияга катышышты, анда аларды башкармалыктын начальниги Бактыбек Нарчаев кабыл алды. Ал ички иштер органдарынын иши тууралуу кенен айтып берди жана имаратта экскурсия өткөрдү.
Иш-чаранын жүрүшүндө балдар Кыргыз Республикасынын Ички иштер министрлигинин Тергөөнү жүргүзүү кызматынын начальниги Мирлан Насиров менен жолугушушту, ал да балдар жана алардын чоң энеси менен баарлашты. Ички иштер министринин атынан аларга iPad планшети, MacBook Air 15 ноутбугу жана таттуу белектер тапшырылды.
Жолугушуунун аягында балдарга окууда ийгилик каалап, келечекте чыныгы милиция адистери болуп, өлкөсүнө чын жүрөктөн кызмат кыларын ишеним менен билдиришти.
Мектеп окуучулары жана алардын үй-бүлөлөрү ички иштер министри жана жетекчиликке алардын кыялдарына көңүл буруп, жаш муунду колдоп жатканы үчүн ыраазычылык билдиришти. Мындай иш-аракеттер жаштар үчүн күчтүү стимул болуп саналат деп белгилешти.
