Кыргызстанда мамлекеттин басма медиа реформасы президенттин жарлыгы менен башталды. Бул тууралуу КРдин маданият, маалымат жана жаштар саясаты министринин орун басары Марат Тагаев билдирди.
Тагаев мурда «Кыргыз Туусу» жана «Слово Кыргызстана» гезиттери, ошондой эле «Байчечекей», «Кырчын» жана «Жеткинчек» журналдары бири-биринен көз карандысыз иштеп келгенин белгиледи. Бул басылмалардын кээ бири чарбалык эсеп боюнча иш алып барып, кызматкерлерине өз алдынча айлык төлөп келген.
«Эми маанилүү чечим кабыл алынды. «Кырчын» жана «Жеткинчек» журналдары жоюлду, алардын негизинде жана башка басылмалардын негизинде жаңы басма үйү — «Кыргыз Туусу» түзүлдү», — деп кошумчалады ал.
Жаңы басма үйүнүн курамына «Кыргыз Туусу» жана «Слово Кыргызстана» гезиттери, ошондой эле жаңы түзүлгөн адабий журнал «Ала-Тоо» жана балдар журналы «Байчечекей» кирди. Бул басылмалар эми мамлекет тарабынан каржыланат.
Министрдин орун басары кызматкерлердин айлыгы толугу менен мамлекеттик бюджеттен жабыларын, ал эми автордук гонорарлар атайын фонддон түшөөрүн баса белгиледи.
Мындан тышкары, реформа алкагында башкаруучулук жана административдик функцияларды бириктирүү жүрөт. «Мурда ар бир басылма өзүнүн директору, бухгалтериясы жана менеджерлери менен иштеп келген, эми борборлоштурулган башкаруу системасы менен бирдиктүү басма үйү иш алып барат», — деп түшүндүрдү Тагав.
Ал ошондой эле өзгөрүүлөр контенттин кыскарылышына же улуттук басылмалардын жабылышына алып келбестигин белгиледи. «Реформанын максаты — тартипке келтирүү, кайталанган функцияларды жоюу жана бюджеттик каражаттарды натыйжалуу пайдалануу. Экономияланган каражаттар контентти өнүктүрүүгө, материалдардын сапатын жакшыртууга жана басылмаларды модернизациялоого жумшалат», — деп жыйынтыктады министрдин орун басары.
