Торобаевдин айтымында, фермерлерге суу электрондук эсептегичтер аркылуу берилет.
Бул жылы Кыргызстандын суу сактагычтарындагы суу көлөмү кыйла азайган. Бул тууралуу суу ресурстары, айыл чарба жана кайра иштетүү өнөр жайы министри Бакыт Торобаев Жогорку Кеңештин агрардык саясатка арналган комитетинин жыйынында билдирди.
Учурда өлкөдөгү 498 суу сактагычта болжол менен 884 миллион кубометр суу топтолгон, бул өткөн жылдын ушул мезгилине салыштырмалуу 30–35% аз. Жалпысынан бардык суу сактагычтардын долбоордук сыйымдуулугу 1 миллиард 757 миллион кубометрди түзөт.
Торобаев ошондой эле 2026-жылга чейин 1 миллион 250 миң гектар жерди себүү пландалганын, анын ичинен 885 миң гектар сугарылуучу болорун белгиледи. Бул талааларды 4–5 жолу сугаруу үчүн 6,3 миллиард кубометр суу талап кылынат.
Бул жылы ирригация системасын өнүктүрүүгө 12,3 миллиард сом бөлүнгөн. Бул каражаттар төмөнкү иштерге жумшалат:
- 776 км каналдарды тазалоо жана оңдоо;
- 657 миң чарчы метр бетон төшөө;
- 590 гидротехникалык курулмаларды калыбына келтирүү;
- 508 суу өлчөө постун, 91 насостук станцияны жана 170 насостук агрегатты оңдоо;
- 46 насостук агрегатты жаңылоо;
- 1,5 миңден ашык электрондук суу эсептегичтерин орнотуу;
- 225 коллектор-дренаждык системаларды оңдоо.
Бакыт Торобаев фермерлер үчүн суу берүү системасы акырындык менен электрондук эсепке өткөрүлөрүн, бул ресурстардын бөлүштүрүлүшүн натыйжалуу көзөмөлдөп, суунун жоготуларын азайтууга мүмкүндүк берерин белгиледи.
Сүрөт www
