Маалыматка ылайык, Талас облусунун Ички иштер башкармалыгы 12-февралдан 20-февралга чейин «Арсенал» аттуу рейддик иш-чара өткөрүү боюнча №55-т буйрук чыгарган.
Иш-чаранын жүрүшүндө шаардык милиция кызматкерлери, ошондой эле Талас, Бакай-Ата, Айтматов жана Манас райондорунун ички иштер бөлүмдөрүнүн кызматкерлери ок атуучу куралга ээ болуп, аңчылык менен алектенген жарандарды көзөмөлдөшөт. Куралдын уруксат берүүчү документтери жана анын сакталуу шарттары текшерилет.
Текшерүүлөрдүн натыйжасында, жарандар Талас шаардык ички иштер башкармалыгына ок атуучу куралдарды ыктыярдуу жана акысыз өткөрүп беришти: 7 даана — Талас шаарынан, 5 — Талас районунан, 2 — Бакай-Ата районунан, 5 — Айтматов районунан, 2 — Манас районунан. Жалпы 21 даана ок атуучу курал өткөрүлдү. Мындан тышкары, белгиленген эрежелерди бузган жарандарга 12 протокол түзүлдү.
