Иш-чарада Бишкектин мэри Айбек Джунушалиев жана Кыргызстан Республикасынын эмгек, социалдык камсыздандыруу жана миграция министри Канат Сагынбаев катышты.
Жыйынды ачып жатып, мэр бардык жарандар үчүн тең укуктарды камсыздоо жана ыңгайлуу чөйрөнү түзүү боюнча системалуу мамиле зарылдыгын белгиледи.
"Бүгүн биз бул жерде жыйынтык чыгаруу үчүн гана эмес, күн сайын олуттуу кыйынчылыктарга туш болгон адамдардын көйгөйлөрүн талкуулоого чогулдук. Биздин милдет — бул чакырыктарга жооп берүү гана эмес, ар бир адам коомдун толук кандуу мүчөсү катары сезе турган келечекти түзүү", - деди ал.
Мэрдин айтымында, өзгөрүүлөр социалдык тармакты гана эмес, шаарды да камтыйт. "Бүгүнкү күндө бардык жолдордун курулушу мүмкүнчүлүгү чектелген адамдардын муктаждыктарын эске алуу менен жүргүзүлүүдө. Пандустар, тактильдик элементтер, атайын автоунаа токтотуучу жайлар, үн сигналдары бар светофорлор, "акылдуу токтотуулар" жана жеткиликтүү маршруттар — бул реалдуулук. Бишкек мүмкүнчүлүгү чектелген адамдар өздөрүн ишенимдүү, эркин жана корголгон сезе турган жерге айланууга тийиш", - деп кошумчалады ал.
Жыйында катышуучуларга мэриянын билим берүү, спорт жана мүмкүнчүлүгү чектелген адамдар үчүн инфратүзүм боюнча учурдагы демилгелерин көрсөтүүчү видеоролик көрсөтүлдү.
Ошондой эле жыйында коомдук уюмдардын өкүлдөрү жана эксперттер, анын ичинде "New Age" коомдук фондунун жетекчиси жана мэрдин кеңешчиси Аскар Турдугулов, угуу мүмкүнчүлүгү чектелген адамдар менен иштөө боюнча адис Алия Турдиева, атайын СДЮСШОРдун тарбиялануучусу жана пара-армрестлинг боюнча дүйнө чемпиону Токтосун уулу Бекбосун, ошондой эле "Оэйсис" кайрымдуулук фондунун директору Мээрим Осмоналиева катышты.
Спикерлер шаардык чөйрөнүн жеткиликтүүлүгүн жакшыртуу боюнча өз демилгелерин бөлүшүп, актуалдуу көйгөйлөрдү белгилеп, алардын чечүү жолдорун сунушташты. Талкуунун жыйынтыгында келечектеги аракеттер үчүн сунуштар иштелип чыкты.
Иш-чара мүмкүнчүлүгү чектелген балдардын чыгармачылык иштеринин көргөзмөсү менен аяктады, ал жыйындын катышуучулары үчүн уюштурулган.
