Китеп искусствында активдүү ишмердүүлүктү 60-жылдарда Владимир Григорьевич Рогачев жүргүзгөн. Ал беш ондон ашык басылманы көркөмдөп, иллюстрациялаган. Ошондой эле, ал көркөм редактор катары да чоң иштерди аткарган. Анын балдар китептерине тарткан иллюстрациялары, адатта, кызыктуу, түстүү акварельдер жана гуаштар болуп келген (М. Меньшиков. «Барбы мындай кыз?» «Мектеп», 1965; К. Абдрахманов. «Неге суу сынбайт?», «Мектеп», 1968; Я. Земляк. «Бул жерде мындай балдар барбы?», «Мектеп», 1968). Кыргыз адабиятынын чыгармаларына тартылган иллюстрациялардан көркөм сапаты менен М. Байджиевдин «Каракурт» (1962. Бүткүл Союздук «Китеп искусствосу» конкурсу боюнча ыраазычылык диплом, СССР ВДНХсынын Бронза медалы), Ч. Айтматовдун «Эне талаа» (1963. Бүткүл Союздук конкурстун ыраазычылык диплом), Токтогулдун «Кырсыктуу кылым» пьесасына (1964), Ю. Смышляевдин «Пишпектин дубалдарында» (1965) тартылган линогравюралар өзгөчөлөнөт.
