«Эски шаардагы маданияттар диалогу» симпозиумунда эки адам ЖКнын ыраазычылык грамотасын алышты
4-октябрда Ош мамлекеттик университетинде «Ош эски шаарындагы маданияттар диалогу» аттуу эл аралык илимий-практикалык симпозиум өттү, ал шаарды 3018-жылдык юбилейине арналган.
Иш-чаранын жүрүшүндө кириш сөз менен шаардык кенештин төрагасы Жапарбек Ормонов, Ош шаарынын вице-мэри Асылбек Топчубаев, ОшГУнун илим боюнча проректору И.Кенжаев, ошондой эле чет өлкөлүк делегациянын жетекчиси, «Дүйнөлүк коомдордун лидерлери» мамлекеттик эмес уюмунын төрагасы сөз сүйлөштү. Ошондой эле иш-чарага Ош шаардык кенешинин депутаттары, профессордук-окутуучулук курамы жана Ош университеттеринин илимий чөйрөлөрүнүн өкүлдөрү катышты.
Симпозиумдун ачылышынын алкагында чектөөсүз тынчтык куруу үчүн жемиштүү жана өзүн арноо менен эмгектенгендиги, руханий-ахлактык жана үй-бүлөлүк баалуулуктарды жайылтууга кошкон салымы, Кыргызстандагы жаш таланттарды колдоо үчүн «Дүйнөлүк коомдордун лидерлери» мамлекеттик эмес уюмунун төрагасы Лариса Горчаковага Жогорку Кенештин ыраазычылык грамотасы тапшырылды. Ошондой эле жаш адистерди даярдоодогу салымы жана эрдиктүү эмгеги үчүн ОшТУнун доценти, техникалык илимдердин кандидаты Маматибраим Самиевге Жогорку Кенештин ыраазычылык грамотасы тапшырылды.
Пленардык жыйындардын алкагында симпозиумдун катышуучулары төмөнкү баяндамаларды жасашты:
- Канышай Нурдинова (Кыргызстан) – к.ф.н., ОшГУнун эл аралык мамилелер факультетинин профессору «Кыргыз Республикасындагы эл аралык мамилелердин азыркы абалы» темасында;
- Чыныкан Сатыбалдиева – к.и.н., ОшГУнун тарых факультетинин доценти «Кыргыздардын орнаменталдык дүйнөсү: маданияттардын параллелдерин чагылдыруу» темасында;
- Лилиана Булатович-Медич (Сербия) «Кыргызстандагы дүйнөлүк лидерлер. Маданият – бул жашоонун негизи» темасында баяндама жасады.
Ошондой эле «Эл аралык кайрымдуулук маданияттар диалогу катары» темасында баяндама болду.
