КРнын Эсеп палатасы тарабынан жүргүзүлгөн аудиттин жыйынтыктарына ылайык, КРнын Транспорт жана байланыш министрлигинде 2251,5 млн сомду түзгөн финансылык мыйзам бузуулар аныкталды. Текшерүү республикалык бюджеттин аткарылышын, ошондой эле министрликтин, анын бөлүмдөрүнүн жана караштуу ишканалардын 2024-жылдагы ишмердүүлүгүн камтыды.
Эсеп палатасынын маалымат кызматына ылайык, көрсөтүлгөн суммадан 2081,1 млн сом кайра калыбына келтирүүгө тийиш. Аудит учурунда 1668,4 млн сом кайтарууга жетишилди, анын ичинен 1667,2 млн сом бухгалтердик эсеп аркылуу жөнгө салынды, ал эми 1,2 млн сом наличный акча түрүндө кайтарылды.
Эң көп мыйзам бузуулар негизги каражаттарды эсепке алуу, таануу жана амортизациялоо боюнча мыйзамдарды бузуу менен байланыштуу болуп, 1768,7 млн сомду түздү. Негизги себептердин бири - капиталдык оңдоолорду камтыган чыгымдарды убагында капиталдаштырбоо болуп, бул активдердин чыныгы наркын бурмалоо коркунучун жаратууда жана финансылык отчеттуулуктун тактыгына терс таасир этет.
Мындан тышкары, төлөмдөрдү, айып пулдарды жана жаза санкцияларын өндүрүү боюнча чараларда кемчиликтер аныкталды, бул 245,6 млн сомдук мыйзам бузууларга алып келди. Жумуштарды аткаруу мөөнөттөрүн узарткан подряддык уюмдарга айып пулдар эсептелгенине карабастан, контролдоо механизмдери жетишсиз болуп калды.
Аудит ошондой эле кызматкерлерге айлык акы жана башка төлөмдөр боюнча ашыкча чыгымдарды 150,2 млн сомго аныктады, бул ички нормалардын жана жоболордун туура эмес колдонулушунан келип чыкты.
Бюджеттик каражаттарды капиталдык салымдар жана курулуш иштерине пайдаланууда да 61,1 млн сомдук олуттуу мыйзам бузуулар аныкталды. Айрыкча, кээ бир долбоорлор боюнча жумуштун көлөмү 22,6 млн сомго негизсиз жогорулатылган, ал эми аткарылган жумуштардын кемчиликтери 38,4 млн сомду түздү.
Аудиторлор мамлекеттик сатып алуулардагы мыйзам бузууларды жана Жол фондуна финансылык жардам көрсөтүү боюнча көйгөйлөрдү, ошондой эле инвестициялык долбоорлордун тизмесин түзүү жана бекитүүдө кемчиликтерди белгилешти.
Аудиттин жыйынтыгы боюнча тиешелүү мамлекеттик органдарга жана аудит субъектине аныкталган кемчиликтерди жоюу, чыгымдарды толук калыбына келтирүү жана келечекте ушундай кырдаалдардын алдын алуу үчүн жазуу жүзүндөгү көрсөтмөлөр жана сунуштар жөнөтүлдү. Ошондой эле, аныкталган мыйзам бузуулар юридикалык жактан бааланууга тийиш экендиги жана кызмат адамдарынын жоопкерчилиги белгиленген тартипте каралаары баса белгиленди.
