Экономика жана соода министрлигинин маалымат кызматынын маалыматына ылайык, 2026-жылдын январь айында Кыргызстандагы орточо айлык номиналдык акы 45 797 сомго жетип, бул өткөн жылдын ушул мезгилине салыштырганда 16,1%га жогорулаган. Бул маалымат Улуттук статистика комитетинин алдын ала эсептөөлөрүнө негизделген.
Инфляцияны эске алганда, реалдуу айлык акы 6,3%га өскөн.
Айлык акылар экономиканын бардык секторлорунда, ар түрдүү ишмердүүлүк жүргүзгөн ишканалар жана уюмдар арасында жогорулаган.
Эң чоң өсүш административдик жана жардамчы ишмердүүлүк тармагында болуп, айлык акы 49,4%га жогорулаган. Саламаттык сактоо жана социалдык кызмат көрсөтүү тармагында 35,8% өсүш байкалса, электр энергиясы, газ жана буу менен камсыздоо тармагында 30,5%га жогорулаган.
Мындан тышкары, кесиптик, илимий жана техникалык ишмердүүлүктө айлык акы 27,8%га, кыймылсыз мүлк операцияларында 26,5%га, ал эми айыл, орман чарбасы жана балык уулоодо 25,3%га өскөн.
Экономика министрлиги айлык акылардын жогорулашы өлкөнүн экономикасындагы жалпы оң динамика фонуна карата болуп жатканын белгилейт.
