Бүгүн, Кыргыз Республикасынын Премьер-министри Джоомарт Оторбаев мамлекеттик жана аскердик ишмер Шабдан — баатырдын туулган күнүнө арналган 175 жылдык салтанаттуу иш-чарага катышты.
Иш-чарада сүйлөгөн сөзүндө, Өкмөт башчысы Шабдан Жантай уулу – Шабдан-баатырдын кыргыз-орус мамилелерин түзүү жана өнүктүрүүгө, кыргыз-турк кызматташтыгын курууга кошкон өзгөчө салымын белгиледи.
«Шабдан-баатыр — өз мезгилинин эң көрүнүктүү адамдарынан, элге чоң руханий таасир эткен жаркын лидер», — деди Джоомарт Оторбаев.
Премьер-министр Шабдан-баатырдын билим берүү системасын өнүктүрүү жана мусулмандар жыйындарын түзүү, медресе жана мектептерди ачуу боюнча аракеттерин белгилеп, кыргыз балдарынын өз тилинде билим алышын камсыз кылганын айтты. Шабдан-баатыр кыргыздардын жердеги менчик укуктарын активдүү коргоп, жергиликтүү элдердин мыйзам чыгаруу органдарында өкүлчүлүгүн камсыз кылуу үчүн күрөшкөн.
“Шабдан-баатырдын өмүр баяны, анын жоокер жана мамлекеттик ишмер катары жолу, акылмандыгы жана адамдык сапаттары, мекенине болгон патриоттук сезими жана сүйүүсү – баары Кыргызстан тарыхында үлгү катары жана келечек муундар үчүн шыктануу булагы болуп калат”, - деди Джоомарт Оторбаев.
Маалымат камсыздоо бөлүмү
Кыргыз Республикасынын Өкмөт Аппараты
Кыргыз Республикасынын Өкмөт Аппараты
