Бишкекте бүгүн Кыргыз Республикасынын ТИМинин жана Катар мамлекетинин ТИМинин ортосунда саясий консультациялардын үчүнчү раунду өттү.
Сырткы саясат ведомствосунун маалымат кызматынын билдирүүсүнө ылайык, делегацияларды Кыргызстандын тышкы иштер министринин орун басары Темирбек Эркинов жана Катар тышкы иштер министринин орун басары д-р Ахмад бин Хасан Аль-Хаммади жетектешти.
Жыйындарда эки тараптуу мамилелердин актуалдуу маселелери, анын ичинде саясий, соода-экономикалык жана маданий аспектилер талкууланды. Ошондой эле тараптар ар кандай деңгээлдеги өз ара визиттерди уюштуруу пландарын жана мурда кол коюлган келишимдерди ишке ашыруу маселелерин, ошондой эле кызматташтыктын укуктук базасын кеңейтүү маселелерин карашты.
Эл аралык жана регионалдык күн тартибин талкуулоо жемиштүү болду, эки тарап да БУУ жана ОИС сыяктуу уюмдардын алкагында кызматташууга даярдыктарын билдирди.
Тараптар Кыргыз Республикасынын ТИМинин жана Катар мамлекетинин ортосунда жетишилген макулдашууларды ишке ашыруу үчүн эки тараптуу жыйналыштарды үзгүлтүксүз өткөрүүнүн зарылдыгы боюнча макулдашышты.
