Түркия Республикасында Кыргыз Республикасының Элчилиги тарабынан Латин Америка өлкөлөрүнүн дипломаттары үчүн кабыл алуу өткөрүлдү. Иш-чарага бул региондогу 15тен ашык элчиликтин өкүлдөрү чогулуп, кызматташтык боюнча маанилүү маселелерди талкуулашты.
Бул кабыл алуунун максаты Кыргызстандын эл аралык аренада, анын ичинде Бириккен Улуттар Уюму сыяктуу көп тараптуу платформаларда демилгелерин илгерилетүү жана эл аралык өнөктөштөр менен кызматташтыкты өнүктүрүү болду.
Түркиядагы Кыргыз Республикасының элчиси Руслан Казакбаев сөз сүйлөп, өлкөнүн тышкы саясатынын негизги багыттарын белгиледи. Ал Кыргызстандын БУУнун Уставына болгон берилгендигин жана туруктуу өнүгүү, эл аралык тынчтык жана коопсуздук маселелеринде активдүү ролун, ошондой эле алдын алуу дипломатиясы жана ортомчулук маанилүүлүгүн баса белгиледи. Мындан тышкары, катышуучуларга президент С.Жапаровдун жетекчилиги астында өлкөдө жүргүзүлүп жаткан учурдагы экономикалык, социалдык жана саясий реформалар тууралуу маалымат берилди.
Казакбаев Кыргызстандын туруктуу экономикалык өсүшүнө, өнөр жай жана курулуш секторунун өнүгүшүнө, инвестициялык климаттын жакшыртылышына жана финансылык системанын бекемделишине көңүл бурду. Кыргыз тарап Латин Америка мамлекеттери менен экономика, соода жана инвестициялар сыяктуу тармактарда саясий диалогду тереңдетүүгө жана практикалык кызматташтыкты кеңейтүүгө даяр экенин билдирди.
Кабыл алуу Кыргызстан менен Латин Америка ортосундагы эки тараптуу жана көп тараптуу мамилелерди өнүктүрүү, ошондой эле эл аралык уюмдардагы ишмердүүлүк боюнча пикир алмашуу жана биргелешкен көз караштарды иштеп чыгуу үчүн маанилүү платформа болду.
