«Кыргызстандын улуттук экономикасы күндөрү» иш-чарасынын алкагында Берлинде Кыргыз Республикасынын илим, жогорку билим берүү жана инновациялар министрлиги менен немис KARL Berufsbildungs-GmbH компаниясынын ортосунда кызматташтык боюнча Меморандумга кол коюлду. Келишимдин предмети кесиптик билим берүүнү өнүктүрүү жана кадрларды даярдоонун дуалдык моделин киргизүү болду, деп билдирди министрликтин басма сөз кызматы.
Документке министрдин орун басары Нурлан Омуров жана KARL Berufsbildungs-GmbH компаниясынын өкүлдөрү, анын ичинде Почеттуу жалпы консул Райнхольд Крэммель жана башкаруучу Мирко Новак кол коюшту. Тараптар дуалдык билим берүү системасын киргизүү, практикага багытталган окуу программаларын өнүктүрүү, тил даярдыгын жакшыртуу, кесиптик практика мүмкүнчүлүктөрүн кеңейтүү жана квалификацияларды өз ара таанууну колдоо боюнча макулдашышты.
Ошондой эле бизнес программасынын алкагында министрдин орун басары Омуров кыргыз-немис Деловой кеңешинин жыйынына катышты.
Ал өз сөзүндө Кыргызстан кесиптик билим берүү системасын эл аралык практикаларга жана дуалдык билим берүү элементтерине таянып активдүү модернизациялап жатканын белгиледи. Министрдин орун басары жумуш ордундагы билим берүү улуттук мыйзамдарда бекитилгенин, бул билим берүү мекемелери менен өнөр жай ишканаларынын кызматташтыгы үчүн бекем негиз түзөрүн баса белгиледи.
Омуров ошондой эле сегиз колледждин Жакшы тажрыйба борборлору статусун алгандыгы тууралуу маалымдады, анда студенттерге жумуш ордунда практикалык көндүмдөрдү алуу үчүн окуу-өндүрүш комплекстерин уюштуруу мүмкүнчүлүгү берилген.
Ал немис өнөр жай структуралары менен өнөктөштүктү тереңдетүүгө кызыкдар экенин билдирип, Германиянын дуалдык модели адистерди даярдоодо үлгү болуп жатканын белгиледи. Анын айтымында, KARL Berufsbildungs-GmbH менен кызматташтык жаңы муун адистерин даярдоо жана биргелешкен долбоорлорду ишке ашыруу үчүн жаңы мүмкүнчүлүктөрдү түзөт.
