Кыргызстандын курулуш министрлиги курулуш аянтчаларындагы санитардык шарттарды текшерүүгө багытталган рейддерди өткөрүп жатканы тууралуу билдирет.
Бишкек жана Ош шаардык мамлекеттик архитектуралык-курулуш контролунун башкармалыгынан инспекторлор курулуш объектилериндеги атайын техника үчүн дөңгөлөктөрдү жууган пункттарды текшеришет.
Курулуш министри Нурдан Орунтаевдин тапшырмасы боюнча, текшерүүлөр төмөнкү аспектилерге көңүл бурат:
— атайын техниканын дөңгөлөктөрүн жууган пункттардын болушу жана иштөө абалы;
— демонтаждык жана жер иштерин жүргүзүү учурунда чаңдын пайда болушун алдын алуу үчүн аймакты нымдоо боюнча иш-чараларды аткаруу;
— КР СН 12-02:2018 «Курулуш өндүрүшүн уюштуруу» нормаларын сактоо.
Бишкек жана Ошто иш жүргүзүп жаткан курулуш уюмдарына санитардык жана экологиялык коопсуздукту камсыздоо үчүн ушул талаптарды сактоосу сунушталат.
Өткөрүлүп жаткан текшерүүлөрдүн негизги максаты шаарлардагы экологиялык абалды жакшыртуу, жолдорду булгануудан сактоо жана курулуш иштеринин жүрүшүндө санитардык нормаларды сактоо болуп саналат.
